‘t Bestuur van Veldeke Krink Ech steltj uch in kènnis van ’t äöverlieje van oze väörzitter Ton Janssen.
Bie de äöpening van de jaorvergadering, begin mieërt 2012, haet Ton op zien persuuenlike en indrökwekkende meneer, de leje in kènnis gesteldj van zien zwake gezóndjheid. Daonao is die allein mer minder gewaore. Ieës langzaam, mer de leste tied snel.
Ton woor sinds 2000 lid van Veldeke Krink Ech. In 2005 noom hae zitting in ’t bestuur en in 2007 noom hae de väörzittershamer äöver van Mevr. Mia Maessen.
Ónger zien väörzittersjap is de krink oetgegreudj tot ‘ne inspirerende en kreatieve krink van Veldeke Limburg. De jaorlikse aktiviteite kómme verder tót bleuj. Ton sjoalde zich taalkundig bie Rob Belemans in Leuve. Hae vroog naodrökkelik aandach väör oos dialect in zien taalkundige aspecte en stèldje daoväör ’t “Brónsgreun Beukske” same mit Piet Aben. De vaste rubrieke “Wie Gezag…En Gesjreve…” en daonao “Wie Gezag ...En Bedoeldj…” wore mèt van zien handj.
Hae haet in zien lèste laevesfase nog kènne biedrage aan de realisering van de dialectspreuke op de tegels in ’t centum van Ech.
Ridder in de orde van Oranje Nassau
Väör ziene inzet in maatsjappelike functies waerdje hae väörig jaor beneumpj tót Ridder in de Orde van Oranje Nassau en väör zien betrokkeheid bie Veldeke Limburg kreeg hae dit jaor ’t ieërelidmaatsjap van Veldeke Limburg.
Ieërelid Veldeke Limburg
Naeve zien leefdje väör oos vereinigingslaeve höbbe weer zien hertelikheid es mins moge ervare. Weer zeen Ton daoväör erg dankbaar en wènse José, de kènjer en kleinkènjer de krach toe om de laevesdraod weer op te pakke en nao Ton zien väörbeeldj wiejer te gaon:
"Laeve is dich inspanne, d’r zeen väör de luuj óm dich haer,
bie laeve huuertj d’n doad, al laefs se nog zoa gaer”
De oetvaartdeens wurtj gehaoje op vriedig 18 mei óm 11.00 oer in de parochiekèrk van de H. Landricus in Ech.
’t Correspondentieadres van José Janssen-Tummers, Ingrid en Arthur en Jos en Marieke is: Koperslagerstraat 17
6101 GV Echt
Ech, 14 mei 2012
Bestuur Veldeke Krink Ech
Miel Coenemans, secretaris